Руски бизнисмен што се вратил дома од егзил со надеж дека ќе избегне затворска казна поради нерешени обвиненија за измама е осуден на четири и пол години затвор, објави деловниот весник Комерсант.
Судот во јужниот руски град Ростов На Дон го прогласи бизнисменот Андреј Каковкин за виновен за проневера на 400.000 долари за купување земјиште.
Каковкин беше еден од истакнатите руски претприемачи на таканаречениот „список Титов“ – неколку богати Руси што избегале од земјата под кривична истрага, па им порачале на руските власти дека се подготвени да се вратат дома и да го вратат своето богатство во татковината ако добијат ветување дека нема да бидат кривично гонети, пренесува Москва тајмс.
„Списокот Титов“
Ова на себе го презеде претседателскиот омбудсман Борис Титов во 2018 година, кој состави список на бизнисмени што бараат начин да се вратат во земјата и вети дека ќе преговара со властите во нивно име.
Во 2018 година, рускиот претседател Владимир Путин ги повика руските бизнисмени да купат девизни обврзници во обид да вратат дома дел од своите огромни странски средства.
[video:https://www.youtube.com/watch?v=uJU91p56Ssc autoplay:0]Идејата за формална амнестија никогаш не беше јавно прифатена, а портпаролот на Кремљ, Дмитриј Песков, вети само дека ќе го разгледа секое лице од случај до случај.
Околу 136 сопственици на компании аплицирале да се вратат преку шемата, според Комерсант, иако само 12 се вратиле во Русија – Каковкин бил првиот што се вратил од Британија во 2018 година, само неколку дена по објавувањето на „списокот Титов“.
Тој беше привремено затворен по враќањето и неговиот случај првично беше отфрлен – за обвинителите да го отворат неколку месеци подоцна. Тој беше осуден на три години затвор во 2019 година во посебна правна битка. Ова подоцна беше сменето во условна казна.
За време на новото судење, тој повторно тврдеше дека е невин и ја критикуваше пресудата на судот. Адвокатите за Комерсант изјавија дека планираат да поднесат жалба на пресудата.
Титов ја прекина кампањата
Титов во јули оваа година рече дека ја прекинал кампањата за репарација на руските бизнисмени со седиште во странство, поради загриженост дека може да се соочат со апсење по пристигнувањето.
Во Титовиот извештај до рускиот претседател Владимир Путин, чии делови беа објавени од агенцијата РИА Новости на 12 јули, се вели дека одлуката за прекин на кампањата е донесена поради пропустот на Генералното обвинителство да гарантира дека руските бизнисмени нема да бидат уапсени по нивното враќање.
Титов претходно рече дека многу бизнисмени се нестрпливи да се вратат во Русија и да соработуваат со истражителите под услов да не бидат веднаш уапсени и сместени во истражните притворни центри, пренесува Радио слободна Европа.
