На прашањето за кого би гласале кога би се одржале парламентарни избори следната недела, 26 проценти од испитаниците ја избрале АфД, додека владејачката Христијанско-демократска унија ЦДУ/ЦСУ го освои второто место со 25 проценти.
Социјалдемократската партија на Германија (СПД), малцинскиот партнер во владејачката коалиција, ја забележа најниската вредност од почетокот на анкетата на јавното мислење на ЗДФ, за која би гласале само 12 проценти од анкетираните. Според истата анкета, 14 проценти од испитаниците би гласале за Зелените, а 11 проценти за Левица.
Вкупно, 65 проценти од испитаниците се незадоволни од работата на владата на Фридрих Мерц, што е уште послаб резултат од последната анкета, кога рекордни 63 проценти од испитаниците ѝ дадоа негативна оценка на владата. Аналитичарите проценуваат дека неодамнешниот пад на популарноста на владините партии се должи на лошата реакција на зголемените цени на горивата во Германија.
Од лошите потези на владата, која откако дојде на власт пред нешто помалку од една година беше критикувана за застој во процесот на реформите, најмногу профитира АфД, која постигна рекордни резултати на изборите во сојузните покраини Баден-Виртемберг и Рајнска област-Пфалц.
АфД води и во анкетите во источногерманските федерални покраини Мекленбург-Западна Померанија и Саксонија-Анхалт, каде што во септември се одржуваат локални парламентарни избори.
Како што покажуваат другите анкети на јавното мислење, на АфД не ѝ наштетија бројните скандали кои ги доживува партијата поради обвинувања за корупција при вработување пријатели и членови на семејството во парламентите во кои се застапени.
