Швеѓаните имаа фантастичен старт на Мундијалот, бидејќи ретко кој очекуваше толку убедлив триумф над секогаш незгодната и конкурентна селекција на Тунис.
Високата победа ја најави Ајари уште во седмата минута, а Исак во 30. минута зголеми на 2-0. Надежта на Тунижаните им ја врати Рекик, кој пред крајот на првото полувреме реализираше за 2-1, резултат со кој се замина на пауза.
Сепак, по само 15 минути игра во вториот дел, Ѓокереш ја врати предноста од два гола и зголеми на 3-1. Во 84. минута Сванберг се погрижи за 4-1, а серијата погодоци ја затвори фудбалерот кој и ја отвори, откако Ајари во 96. минута ги постави конечните 5-1.
За разлика од оваа голеада, на дуелот меѓу Брегот на Слоновата Коска и Еквадор мрежите мируваа речиси во текот на целиот натпревар, па победникот се решаваше во самиот финиш.
Херој на африканската селекција беше Дијало, кој постигна гол во 90. минута за минимален триумф и успешен старт на првенството со освоени три бода.
