За љубителите на кофеин или за секој што доживува пад на енергијата попладне, прашањето колку доцна во денот треба да се пие кафе долго време е предмет на дебата, пишува германската новинска агенција Дпа.
Во зависност од тоа колку рано некој се буди или ја пие својата прва шолја кафе, препораките се движат од тоа да не се пие кафе после пладне до тоа да не се пие по 15 часот.
Се смета дека пиењето кафе подоцна во текот на денот може да го отежни заспивањето навечер, без оглед на тоа колку сте уморни.
Сепак, според научниците од Медицинскиот универзитет во Вроцлав во Полска, проблемот не е дали кафето го одложува сонот, туку што се случува со мозокот во текот на ноќта под дејство на кофеинот.
Истражувачкиот тим открил дека ефектите не мора нужно да се манифестираат преку пократок сон или тешкотии при заспивање. Наместо тоа, квалитетот на ноќниот одмор може да биде нарушен бидејќи кофеинот предизвикува „плиток“ сон.
„Организмот може да помине осум часа во кревет, но мозокот можеби нема да биде целосно обновен“, велат научниците, повикувајќи се на податоци добиени од електроенцефалографија (ЕЕГ), односно снимање на мозочната активност.
„Луѓето често не се свесни за ова“, се вели во соопштението на универзитетот, објаснувајќи дека кафето влијае различно врз луѓето во зависност од голем број фактори, вклучувајќи ја возраста, метаболизмот, физичката кондиција и нивото на стрес.
„ЕЕГ ни овозможува да видиме не само дали некое лице спие, туку и како спие неговиот мозок“, вели професорката Доната Курпас.
Резултатите од истражувањето сугерираат дека секој што сака да го подобри квалитетот на спиењето треба да му даде на своето тело доволно време целосно да го метаболизира целиот кофеин што го консумира пред вечерта.
„Кофеинот не е ниту добар ниту лош“, вели Курпас.
„Тоа е биолошки активна супстанца чии ефекти зависат од дозата, времето од денот, возраста, начинот на живот, квалитетот на спиењето, нивото на стрес и индивидуалната чувствителност.“
За некои луѓе утринското кафе може да биде подеднакво ризично како што е за други кафе непосредно пред спиење.
„Квантитативната ЕЕГ анализа открива посуптилни промени, како што е намалена активност на бавните мозочни бранови, што е важен индикатор за длабочината на спиењето и неговиот регенеративен ефект“, истакна Доната Курпас, предупредувајќи дека ваквите ефекти можат да останат незабележани кај луѓето кои погрешно веруваат дека добро се наспале.
