Од ракометниот клуб соопштија дека во истиот термин веќе имаат закажана клупска прослава на која ќе присуствуваат играчите, стручниот штаб, раководството, спонзорите и пријателите на клубот.
„АД Ракометен Клуб Вардар 1961 имаше исклучително успешна сезона во која ги обедини титулите во Македонија и имаше успешен настап во Европа. Горди сме што овие успеси ги постигнавме пред полни сали и го привлековме вниманието на целокупната спортска јавност.
Овие успеси немаше да бидат возможни без нашите навивачи, но и нашите спонзори, партнери и пријатели. По тој повод пред извесен период ние веќе го дефиниравме датумот и ги испративме поканите за нашата прослава на која ќе присуствуваат сите играчи, членови на стручниот штаб, раководството на клубот, спонзори и ВИП личности.
Прославата ќе биде одржана на 23 мај со почеток во 20:30 часот, па не би можеле да присуствуваме на прославата која ќе биде организирана од страна на ФК Вардар, а на која беше најавено нашето присуство.
На нашите колеги од ФК Вардар им ја честитаме титулата и им посакуваме успешен настап во Европа“, соопштија од РК Вардар.
Тоа значи дека фудбалскиот клуб ќе организира самостојна прослава по натпреварот против Шкендија во последното коло од ПМФЛ. Прославата е закажана на „Школка“ во Градски парк.
