„Укажуваме дека кривичен прогон кон новинари за дела за кои се предвидуваат повеќе години затвор, посебно од страна на безбедносни структури може дополнително да ја загрозат и така кревката слобода на изразување во нашата земја. Вакви постапки може да се толкуваат како притисок кон јавна критика, посебно земајќи предвид дека оваа емисија е објавена во јануари 2021 година, а засегнатите се повикани на давање на исказ во ОЈО кон крајот на ноември или речиси девет месеци подоцна.
Цениме дека новинарите имаат и право и обврска да се занимаваат и со теми кои се поврзани со националната безбедност, почитувајќи ги во целост етичките и професионалните стандарди во работењето и следејќи го јавниот интерес.
Доколку Агенцијата за разузнавање или која било друга институција е незадоволна од начинот на кој новинарите или медиумите известуваат за нивната работа ги охрабруваме да ги користат само/регулативните механизми“, пишува во соопштението од ЗНМ.
Притоа се додава дека поднесувањето претставки до Советот за етика или Советот на честа е најдобар начин да се утврди дали известувањето е во согласност со етичките принципи и стандарди на новинарската професија.
„Кривичните тужби кон новинари беа честа пракса во минатото и поради нив Македонија драстично падна на сите кредибилни индекси за слободата на изразување и беше перципирана како држава во која слободата на изразување и правото на информирање е ограничено“, додаваат од ЗНМ.
