„Во текот на целата ноќ, капацитетите на сите институции се целосно ангажирани, замолувам за трпение, истрагата трае. Донесовме одлука на нашите експерти им се придружуваат експерти од странство и барам сите уреди да бидат презентирани. Од одговорност нема никој да биде амнестиран. Во моментот кога се случил пожарот имало 26 пациенти и медицински персонал од 2 лекари и 4 медицински сестри. Оние 12 кои се преживеани, се хоспитализирани во болницата во Тетово и тие немаат повреди од пожарот. Починатите се на возраст од 29 до 79 години, а освен обдукции се прават и ДНК анализи за што се информирани и семејствата”, рече Филипче.
Министерот Филипче појасни дека истрагата треба да утврди дали објектот бил одржуван и раководен, а Министерството за здравство ќе соработува со истражните органи, а тоа треба да биде така и со останатите институции.
„Нашиот интерен увид покажа дека сите останати модуларни болници се со сертификати и се она што е вградено е со сертификат и под надзор на акредитирана компанија. Граѓаните и медиумите да не создаваат недоверба кон останатите модуларни болници кои што значат во оваа ковид-криза. Пожари се случуваат и тие можат да бидат предизвикани од многу фактори. Затоа треба да почекаме да заврши истрагата”, додаде Филипче.
