Надворешната канцеларија за криминалистички работи Крива Паланка поднесе кривична пријава против 39-годишниот С.М. поради сомнение за сторени кривични дела спречување службено лице при вршење службено дејствие и симнување и оштетување на службен печат или знак.
Според информациите од полицијата, на 25 март 2026 година во Крива Паланка, пријавениот не постапил по наредба на полициски службеник, ја скинал службената лепенка и го отклучил возилото со кое претходно сторил кривично дело безобѕирно управување со моторно возило.
Во друг случај, надворешната канцеларија за криминалистички работи Струга поднесе кривична пријава против 64-годишниот К.М. поради сомнение за кривично дело напад врз службено лице при вршење работи на безбедноста.
Како што соопшти полицијата, на 14 мај 2026 година во Струга, пријавениот физички нападнал полициски службеник додека извршувал службени дејствија. По документирање на случајот, против него е поднесена соодветна кривична пријава.
Напад на полицаец бил пријавен и во село Сингелиќ, скопско. Полициски службеници од СВР Скопје го привеле С.Р., затоа што го нарушил јавниот ред и мир со агресивно однесување и затоа што се заканувал со остар предмет на полициски службеник кој извршувал службени дејствија. По целосно документирање на случајот, ќе следува соодветна пријава.
Утрото на 20 мај 2026 годин, три часа после полноќ, полициски службеници од СВР Скопје привеле малолетник затоа што во Градскиот парк на подрачјето на Карпош го нарушил јавниот ред и мир со агресивно однесување кон полициски службеници кои извршувале службени дејствија.
„При извршени проверки над него, било констатирано дека е под дејство на алкохол, односно дека има 1,82 промили алкохол во крвта. По целосно документирање на случајот, ќе следува соодветен поднесок“, информираа од МВР.
