Министерството за здравство во соопштението наведува дека им стои на располагање на сите институции и дека сака да соработува и да ја приложи целокупната документација со која располага за поставувањето на сите 17 регионални ковид центри. Наведено е за каква документација станува збор:
„Стручни технички извештаи од извршените испитувања на отпорите на заштитното заземјување, испитување на непрекинатоста на заштитниот проводник и отпорите на распространување на инсталацијата за заштита од атмосферски празнења, сертификати за тестирање и квалитет на материјалите кои се вградени во префабрикуваните модуларни контејнери, сертификати за ѕидни и кровни панели, за подови, известувања за извршена хидро проба и тестирање на инсталираната водоводна мрежа, известувања за исполнетост на минимални технички барања во однос на конструкција, плафони, столарија, греење и ладење, инсталации и подови, изјава за сообразност, записници од примопредавање на префабрикуваните модуларни контејнери-регионални ковид центри, решенија за пренесување на вредност на модуларни контејнери, како и решенија за пренесување на вредност на инвентар и немедицинска опрема на болниците се достапни за увид“.
Министерството за здравство информира дека „откако изведувачот ќе ги поставеше модуларните контејнери се вршеше примопредавање на истите“, а дека примпредавањеето го извршувале инженери од министерствата за здравство и за труд и социјална политика, како и претставници од изведувачот и од болниците, „со што модуларните контејнери се предаваа на болниците во целост согласно техничките спецификации од договорот“.
Министерството за здравство во соопштението наведува дека не сака да се меша во јавно обвинителските одлуки и дејствувања, ниту да наштети на истрагата што ја водат Основното јавно обвинителство и Обвинителството за гонење организиран криминал и корупција.
„По претходна нивна дозвола, документацијата со која располагаме подготвени сме да ја доставиме на увид“, велат од Министерството за здравство.
Фото: Роберт Атанасовски
