Според информациите, нема повредени лица. Побарана е интервенција од службени лица од МВР, како и од надлежните институции.
„За настанот се известени ТППЕ Гевгелија, ЕЛС Гевгелија и ПС Гевгелија, кои ќе преземат понатамошни мерки во согласност со своите надлежности“, соопшти ЦУК.
Во Скопје, како резултат на силниот ветер во скопската котлина, на шест локации се пријавени паднати дрвја и искинати кабли, при што е причинета материјална штета на повеќе автомобили.
За состојбата се известени СВР Скопје и ЈП „Паркови и зеленило“, кои преземаат мерки во рамки на своите надлежности.
„Одговорот од Паркови и зеленило е дека има многу вакви ситуации предизвикани од силниот ветер и ќе постапуваат по приоритети од досега пријавеното“, информираа од ЦУК.
Во врска со поплавите од претходните денови во селата Чајлане, Буковиќ и Семениште, состојбата постепено се нормализира.
Во Тетово, патниот правец Тумчевиште–Чегране сè уште е затворен за сообраќај поради безбедносни причини. Нивото на реката Вардар е намалено во однос на претходните три дена и во моментов нема опасност од излевање.
Во текот на ноќта, во селата Нераште и Глоѓи (Општина Теарце) паднати се две бандери од Телеком. Во село Нераште бандерата е падната покрај патот и не го блокира сообраќајот. Во село Глоѓи бандерата е падната преку патот. Известен е Телеком, а проблемот ќе се решава во текот на денот.
На територијата на Кичево се очекува понатамошна стабилизација на состојбата.
Нема пријави за одрони на магистралните патишта и сообраќајот се одвива редовно.
Бројот на евакуирани лица останува непроменет, 250 лица (63 семејства), на кои редовно им се доставуваат храна, вода и неопходни средства. Екипа од Медицинскиот центар врши здравствени прегледи и дава соодветни совети на евакуираните лица.
Екипи на ЈП „Комуналец“ работат на расчистување и продлабочување на коритото на Зајашка Река, со поддршка од механизација на локални компании. Паралелно се врши чистење на фекалната и атмосферската канализација. ТППЕ, со поддршка на пумпи од ПО ДЗС Кичево, продолжува со испумпување на водата од подрумите на улиците Прилепска, Пиринска, Први Мај, 29 Ноември и други локации каде има пријави за поплавени објекти.
