На седницата, за нов член во постојаниот, работен состав на синодот е избран митрополитот струмички г. Наум, додека за негов заменик е избран митрополитот европски г. Пимен.
Од МПЦ-ОА соопштија дека на седницата, одржана во полн состав, биле разгледани повеќе прашања и настани поврзани со животот на Црквата, како и годишните извештаи од епархиите во земјата и дијаспората.
„Светиот синод ги разгледа и ги усвои годишните извештаи од епархиите на МПЦ–ОА во татковината и дијаспората при што обрна посебно внимание на оние показатели кои сведочат за демографската состојба кај македонскиот православен народ“, се наведува во соопштението.
Воден од, како што посочуваат, пастирската грижа, синодот одлучил да формира и Фонд за поткрепа на многудетни семејства.
Архиереите ја разгледале и состојбата на духовното и културното богатство во македонските храмови и манастири, при што со жалење констатирале дека тоа се наоѓа во лоша состојба поради недостиг на доволно стручни кадри за конзервација.
Од Синодот апелираат до надлежните институции неодложно да преземат мерки за зачувување на црковното и културното наследство.
Како основач на воспитно-образовните институции при МПЦ-ОА, синодот ја поздравил и работата на Управата на Богословијата, која во учебната 2025/2026 година спровела наставна програма во траење од четири години.
Денот за упис на нови ученици во Богословијата е закажан за 19 јуни 2026 година.
