„Ќе се заложам сите сорти грозје да бидат опфатени со помошта од два денара за килограм. Владата навистина е на страната на земјоделците, за што зборува и фактот дека во 2020 година и покрај економската криза предизвикана со пандемијата, државата исплати 20 милиони евра за лозарството, дел за субвенции а дел преку ковид – пакетите“, кажал Хоџа.
На состанокот присуствувале и директорот на Инспекторатот за земјоделство Зоран Шапуриќ и градоначалникот на Неготино, Тони Делков.
„Инспекторатот е на терен, сита ваги се баждарени, а во наредните денови инспекциските контроли ќе бидат уште повеќе засилени“, кажал Шапуриќ.
Тој и министерот на лозарите им порачале доколку имаат проблем во проценката на тежината, шеќерноста или откупната цена, веднаш да ги известуваат на телефонските броеви, со цел никој да не биде оштетен, а откупот на грозје да тече како што е договорено.
„Ова особено важи доколку винарските визби не ги почитуваат цените кои се јавно истакнати, секој земјоделец е повикан да пријави направилност веднаш. По пријавите за неправилност, веднаш ќе бидат испратени инспектори да ја утврдат фактичката состојба“, ветиле Хоџа и Шапуриќ.
Градоначалникот Делков повторно информира дека Општината објави повик за пријавување штети предизвикани од суша и ги повика сите оштетени да аплицираат.
