Инцидентот со операторот на светилки и цевки Џејсон Милер се случил пред извесно време, а Скај њуз дознал за него преку веб-страница за собирање пари за лекување на човекот.
Милер работел на продукциската локација во Ново Мексико кога бил каснат во раката од кафеав пустински пајак, кој во својот плен вбризгува отров што го убива ткивото.
Членот на екипажот бил хоспитализиран неколку дена по каснувањето, бидејќи доживеал тешки симптоми, вклучувајќи некроза и сепса.
Човекот „секојдневно е подложен на повеќе операции додека лекарите даваат сѐ од себе за да ја спречат инфекцијата и да се обидат да му ја спасат раката од ампутација“, се вели во пораката на платформата за собирање средства.
Дури и во најдоброто сценарио, „ќе биде многу долг патот до закрепнувањето на Џејсон ако медицинскиот тим успее да му ја спаси раката“, се додава.
Скај њуз ги контактирал продуцентите во врска со тоа што се случило со Милер, а тие одговориле: „Не коментираме поединечни членови на актерската екипа и приватните работи на екипата“.
Страницата за собирање средства за Милер по објавувањето на веста е отстранета од веб-сајтот.
Беше одлучено снимањето на Раст да престане откако кинематограферката Халина Хачинс почина на снимањето на 21 октомври.
Главната ѕвезда и продуцент на филмот, Алек Болдвин, случајно пукнал со пиштол во Хачинс за време на проба, при што го рани и режисерот Џоел Суза.
Неколку моменти пред да го повлече чкрапалото, Болдвин од помошник-режисерот добил уверување дека пиштолот е безбеден за употреба. Засега не е јасно како вистинските куршуми се нашле во пиштолот, но колегите од екипажот го опишаа оружарот на филмот како неискусен и „малку невнимателен со пиштолите“.
