Како што информираат организаторите, изложбата претставува заеднички уметнички проект на Пелтроу од Клермон-Феранд, Франција, и Самандова од Скопје, кои преку видео, објекти и скулптури ја истражуваат урбаната и културната слоевитост на главниот град.
Во поставката, Скопје е претставен како „жив организам што чува траги од секоја љубов, очекување, мисла и градба“, низ уметнички интерпретации на различни архитектонски периоди – од калдрмата и старите патеки до бруталистичките и модернистички фасади и неокласичните слоеви, како и празнините што се појавуваат меѓу нив.
Изложбата ги поврзува индивидуалните уметнички позиции на авторите, при што еден поглед доаѓа од позиција на жител, а другиот од уметник-посетител. Преку оваа перспектива се отвора прашањето за постојаната трансформација на градот, неговата недовршеност и новите можности за читање на урбаниот простор.
Според најавата, концептот се базира на идејата за „талкање“ како уметничка и етичка пракса, која овозможува ново разбирање на односот меѓу архитектурата, секојдневието и очекувањата.
Изложбата „Секогаш во изградба“ се реализира во рамки на Европскиот проект „CreArt – Уметник во престој“, кој по седми пат се одржува во КИЦ – Скопје, со поддршка од Град Скопје и Европската комисија.
Ивана Самандова (1997, Скопје) е интердисциплинарна уметница која во својата работа ги истражува социо-политичките контексти и динамиките на моќ преку нови медиуми и инсталации. Таа има реализирано повеќе самостојни и групни изложби и е добитничка на наградата „Борко Лазески“.
Исмаел Пелтроу е француски уметник чија практика се движи помеѓу видео, перформанс, инсталација и скулптура. Учествувал на бројни меѓународни резиденции и изложби, и е ко-основач на програмата „WorkParty“ за поддршка на видео уметници.
