Одлуката за спортските натпревари е донесена со идеолошки поделени гласови од 6-3, што значи дека законите во повеќе од половина од американските држави, кои се слични на оние во Западна Вирџинија и Ајдахо, веројатно ќе останат на сила. Конзервативните држави тврдат дека овие закони се неопходни за да се обезбеди еднаква конкуренција за биолошките спортистки.
„Законодавните тела и училиштата се подобро опремени и уставно посоодветни да ги оценуваат конкурентските медицински и научни аргументи и да поставуваат соодветни граници“, напиша судијата Брет Кавано во мнозинското мислење. Пресудата претставува голем пораз за ЛГБТ движењето пред конзервативниот Врховен суд и доаѓа една година откако судиите им дозволија на државите да ја забранат трансродовата грижа за малолетници, како што се блокатори на пубертетот и хормонска терапија. Оттогаш, судот ја одобри забраната за служење на трансродови лица во војската и обврската за наведување на полот при раѓање во пасошите.
Еден од двата случаи за кои судот одлучи беше инициран од Беки Пепер-Џексон, трансродова средношколка која со години се натпреварувала во атлетика, поточно во фрлање ѓуле. Таа го оспори законот од 2021 година во Западна Вирџинија со кој им се забранува на трансродовите „девојки“ да учествуваат во женски спортски тимови. „Некој мора да го направи тоа затоа што е едноставно ужасно“, изјави Пепер-Џексон за Си-ен-ен пред рочиштето.
„Знам дека можам да се справам со тоа и никогаш не ми падна на памет да се откажам затоа што знам дека го правам ова за сите“. Нејзините адвокати истакнаа дека таа започнала со хормонска терапија во шесто одделение и дека „никогаш не ги искусила ефектите на тестостеронот врз своето тело“, поради што нема биолошка предност што државата сака да ја регулира. Другиот случај ја вклучуваше ученичката Линдзи Хекокс, која оспори сличен закон во Ајдахо, но оттогаш ја отфрли тужбата.
Анкетите покажуваат дека јавноста генерално ги поддржува ограничувањата за трансродовите спортисти. Анкета на Правниот факултет Маркет од мај покажа дека 63 отсто од возрасните Американци веруваат дека ваквите забрани се уставни.
На последниот ден од сесијата, судиите ќе донесат одлука и за обидот на републиканците да ги ублажат ограничувањата за финансирање на политичките кампањи. Републиканците тврдат дека ограничувањата на износите што партиските комитети можат да ги потрошат во координација со кампањата го кршат Првиот амандман. Успехот на оваа тужба би им го олеснил на големите донатори полесно да им парираат на масовните мали донации што честопати им давале предност на демократите и би им дал на политичките партии централна улога во протокот на пари за време на изборите.
