Договорот за управување и отстранување на плутониум (ПМДА), потпишан во 2000 година, ги обврзува и Соединетите Американски Држави и Русија да се ослободат од најмалку 34 тони плутониум наменет за оружје, што според американските претставници се доволни за дури 17.000 нуклеарни боеви глави. Договорот стапи во сила во 2011 година.
„Соединетите Американски Држави презедоа низа нови антируски чекори кои фундаментално ја менуваат стратешката рамнотежа што преовладуваше во времето на Договорот и создаваат дополнителни закани за стратешката стабилност“, изјавија руските власти во соопштението во кое го објаснуваат своето повлекување од пактот.
По демонтирањето на илјадници боеви глави по Студената војна, и Москва и Вашингтон сè уште имаат огромни залихи на плутониум за оружје, кој е скап за складирање и претставува потенцијален ризик од ширење.
Целта на ПМДА беше ослободување од плутониумот наменет за оружје со негово претворање во побезбедни форми, како што е гориво на мешани оксиди (МОКС), или со испуштање на плутониумот во брзи неутронски реактори со цел производство на електрична енергија.
Русија го суспендираше договорот во 2016 година, наведувајќи ги американските санкции и непријателските акти против Русија, како што ги нарече, како и проширувањето на НАТО и промените во начинот на кој САД управуваат со својот плутониум.
Русија во тоа време изјави дека САД не се придржуваат кон договорот откако Вашингтон, без руско одобрение, едноставно го разреди плутониумот.
Русија и САД се убедливо најголемите нуклеарни сили во светот и заедно контролираат околу 8.000 нуклеарни боеви глави, што е сепак далеку помалку од рекордните 73.000 боеви глави во 1986 година, според Федерацијата на американски научници.
