„Брисел во последните неколку недели очигледно ја нападна Унгарија поради законот кој ги штити децата. Унгарските закони не дозволуваат сексуална пропаганда во градинките, училиштата, на телевизија при рекламирање“, рече премиерот во видеото објавено на Фејсбук.
Потоа наброја пет прашања, меѓу кои и дали Унгарците прифаќаат на училиште да се зборува за сексуалноста со нивните деца без нивно одобрување, дали поддржуваат промовирање на третман за промена на пол за малолетници и дали поддржуваат „неограничена презентација пред малолетниците на медиумска содржина од сексуална природа што влијае на нивниот развој“.
Орбан, кој не го наведе датумот на референдумот, побара од Унгарците да одговорат „не“ на сите прашања.
Во средината на јуни, унгарскиот парламент донесе закон со кој се забранува „промовирање“ на хомосексуалноста кај малолетници.
Европската комисија смета дека законот е дискриминирачки за ЛГБТ+ лицата и покрена прекршочна постапка против Унгарија, што може да доведе до спор пред Судот на правдата на ЕУ, а потоа и до финансиски санкции.
