Анализата на возниот парк од 1 јануари покажува дека возилата со мотори со внатрешно согорување се уште доминираат. Германски Ауто билд пишува дека бензинските возила сочинуваат 59,3 проценти од вкупниот број патнички автомобили (29,3 милиони), додека дизел возилата сочинуваат 27 проценти (13,4 милиони). Целосно електричните автомобили сочинуваат 4,1 процент од возниот парк со два милиони регистрирани возила. Хибридните погони се значително повеќе застапени со 4,4 милиони возила (8,8 проценти), од кои 1,1 милион се плагин хибриди.
Во првите два месеци од оваа година во Германија се регистрирани вкупно 405.243 нови автомобили, што е намалување од 1,4 проценти во споредба со истиот период минатата година. Рангирањето на најпродаваните модели сè уште го води триото на Фолксваген.
Фолксваген голф е на прво место со 13.165 регистрации, и покрај падот на продажбата од 10,3 проценти. По него следуваат фолксваген тигуан (8.562) и фолксваген Т-рок (8.203), кои исто така забележаа значителен пад од 28,6, односно 31 процент.
На четвртото место е шкода октавија со продадени 7.760 единици и мал пад од 1,7 проценти. Голем скок забележа опел корса на петтото место со 6.849 регистрации и раст од 21,7 проценти. Меѓу првите десет се новиот модел шкода елрок (6.527), ауди A6 (6.304) со импресивен раст од 48,6 проценти, фолксваген пасат (6.174), БМВ икс1 (5.998) и мерцедес ГЛЦ (5.674).
Значителен раст на продажбата во споредба со минатата година постигнаа и модели како мерцедес ЦЛА, чија продажба се зголеми за дури 179,3 проценти, по што следуваат ситроен Ц3 (115,8 проценти), опел грандленд Икс (79,9 проценти) и фиат дукато (70,8 проценти).
Од друга страна, меѓу моделите со најголем пад на продажбата се издвојува купра форментор (-54,4 проценти) – овој пад е резултат на исклучително успешниот почеток на продажбата на овој модел, па затоа падот беше очекуван. Во тоа друштво се електричните модели на фолксваген ИД.4 и ИД.5 (-49,6 проценти).
Тесла модел ипсилон забележа раст од 22,1 проценти со 2.459 регистрации. На листата се појавија и сосема нови модели како што се фолксваген таврон, дачија бигстер и БИД долфин сурф.
