Победникот на парламентарните избори во Унгарија на 12 април, Маѓар, изјави дека идните политички разговори со Словачка ќе зависат од гаранциите во врска со правата на етничките Унгарци што живеат во земјата.
„Јасно ставив до знаење дека можеме да се вклучиме во разговори за какви било политички прашања само ако добиеме гаранции дека Словачка ќе го укине законодавството што им се заканува на Унгарците со затвор“, рече тој на платформата на социјалните медиуми на американската компанија Икс.
Тој, исто така, побара гаранции дека нема да има идни заплени на земјиште од етнички Унгарци според Бенешовите декрети, збир закони по Втората светска војна кои остануваат чувствително прашање во унгарско-словачките односи.
Маѓар рече дека заштитата на правата на унгарското малцинство во Словачка ќе остане врвен приоритет на секоја унгарска влада, сигнализирајќи подготвеност за зајакнување на билатералните односи и обновување на соработката во рамките на Вишеградската група.
Фицо ги призна разликите
Фицо рече дека му честитал на Маѓар за резултатот од изборите и го поканил на официјална посета на Словачка, додавајќи дека двете страни прво ќе се сретнат на маргините на претстојниот самит на Европскиот совет во Брисел.
Фицо го истакна својот интерес за одржување стабилни односи со Унгарија, особено во областа на енергетската безбедност.
„Главната причина за мојот повик беше да ги дознаам ставовите на новото унгарско политичко раководство за повторното отворање на нафтоводот Дружба и тужбата против регулативата на ЕУ“, рече Фицо, осврнувајќи се на заедничкиот правен предизвик на Словачка и Унгарија против плановите на ЕУ за постепено укинување на руските енергетски снабдувања.
Сепак, Фицо призна дека двете страни имаат фундаментално различни ставови за Бенешовите декрети, опишувајќи го прашањето како клучна точка на несогласување во билатералните односи.
Тој додаде дека Маѓар, кој сè уште формално не ја презел функцијата премиер, за време на разговорот одговарал на прашањата воопштено.
Маѓар претходно изјави дека се надева дека ќе положи заклетва како нов премиер на Унгарија на 9 или 10 мај, во зависност од одлуката на претседателот за тоа кога ќе се состане парламентот.
