Истражувачки тим предводен од д-р Рашид Ахмад од Институтот за дијабетес Дасман во Кувајт следел две групи глувци во текот на 16 недели. Едната група била на исхрана со малку маснотии и сахароза, еден вид шеќер во исхраната, додека другата била на исхрана со малку маснотии без сахароза.
За време на експериментот, научниците ја следеле толеранцијата на гликоза, чувствителноста на инсулин, нивоата на метаболички хормони, составот на цревните бактерии и знаците на воспаление во дебелото црево и црниот дроб.
На крајот од истражувањето, двете групи имале приближно иста телесна тежина, но глувците без сахароза развиле послаба контрола на глукозата, инсулинска резистенција, нарушувања во цревната микробиота, воспаление на црева и промени поврзани со масна болест на црниот дроб.
Ахмад во соопштението изјави: „Целосното отстранување на сахарозата од исхраната со малку маснотии може неочекувано да го наруши здравјето на цревата и да предизвика воспаление и метаболичка дисфункција“.
Тој додаде дека резултатите покажуваат дека урамнотежената исхрана е поважна од исклучувањето на шеќерот.
Авторите нагласуваат дека заклучоците не можат да се толкуваат како повик за неограничено консумирање слатки. Проблемот, според студијата, се првенствено додадените шеќери во преработената храна и пијалаци, чие прекумерно внесување го зголемува ризикот од висок крвен притисок, хронично воспаление, расипување на забите, зголемување на телесната тежина, дијабетес тип 2 и срцеви заболувања. Препораката на Американската асоцијација за срце останува дека мажите дневно треба да внесуваат најмногу девет лажички додаден шеќер, а жените шест.
