Најдобар резултат постигна десничарската партија Републиканци, која ја доби довербата од 38 проценти од гласачите, а по неа следуваат социјалистите и зелените со околу 35 проценти, пренесува Франс 24.
Ле Пен на локалните избори влезе со амбиција да освои повеќе региони, што ќе ѝ беше голема предност на претседателските избори следната година, но нејзините кандидати најверојатно нема да победат во ниту еден од нив.
Најголеми шанси ѝ беа давани во регионот Прованса-Алпи-Азурен брег, но излезните анкети покажуваат дека нејзиниот кандидат освоил 44,2 проценти од гласовите, а претставникот на републиканците 55,8.
Слично заврши и трката во регионот О де Франс, каде што конзервативниот Гзавие Бертранд победи убедливо со 52,7 проценти од гласовите, пред кандидатот на Националниот сојуз, кој освои 25,9 и кандидатот на левицата со 21,4 проценти од гласовите.
Во најбогатиот и најнаселен регион, Ил де Франс, во кој е и Париз, победи конзервативката Валери Пекрес со 45% од гласовите. Зад неа беа кандидатот на Зелените со 32 и претставниците на Националниот сојуз и Република во движење со по 10% гласови.
И денешниот втор круг на изборите беше обележан со исклучително низок одѕив, бидејќи гласаа само 33,7 проценти од гласачите.
