Две лица загинаа, а најмалку 20 се хоспитализирани. Пожарникарите и другите служби за итни случаи продолжуваат да се борат против ширењето на огромните пожари во најпогодените области – северно од Атина и на островот Евија.
Еден голем пожар напредува по падините на планината Парнит, национален парк северно од Атина, каде што се наоѓаат некои од последните значајни шуми во близина на грчката престолнина. Чадот кој предизвикува гушење се шири низ Атина, каде властите отворија телефонска линија за жителите кои имаат проблеми со дишењето. Во текот на ноќта и во текот на целиот ден, противпожарните екипи се борат да ги спречат тековните пожари.
Во апокалиптични сцени што траеле до ноќта, мали траекти и други бродови евакуирале 1.400 луѓе од крајбрежно село и плажи на Евија, остров со нерамни шумски планини, популарен меѓу туристите и камперите, откако пламенот ги пресече другите патеки за бегство. Додека луѓето бегале со бродови, зад нив ридовите биле прекриени со високи пламени и чад.
Локален претставник во регионот Мани на Пелопонез процени дека пожарот уништил околу 70% од неговата површина.
„Тоа е библиска катастрофа. Зборуваме за три четвртини од општината“, изјави заменик-градоначалникот на Ист Мани Дракулаку, за државната телевизија ЕРТ, молејќи за повеќе канадери.
Размерот на грчките пожари е неверојатен, влегуваат во петти ден и постојано се разгорувани од ветровите. Во последните денови ширум земјата избувнаа повеќе од 100. За среќа, повеќето биле брзо локализирани, но неколку од нив брзо излегле од контрола, палејќи куќи и предизвикувајќи неискажлива еколошка штета. Полицијата вчера одела од врата до врата во предградија северно од Атина, повикувајќи ги луѓето да се евакуираат.
Вчера, сè посилните ветрови го разгореле веќе огромниот шумски пожар северно од грчкиот главен град. Пожарот, исто така, ѝ се закани на инсталацијата клучна за снабдување со електрична енергија на Атина, а пристапот до дел од автопатот бил отсечен.
Ситуацијата е уште полоша на островот Евија. Оттаму, стотици луѓе се евакуирани со чамци поради шумски пожар што се приближил до крајбрежните области.
Елени Миришвили, шефица на противпожарната служба во Атина, опиша апокалиптични сцени откако куќи и села изгореа како резултат на пожар на североистокот од грчката престолнина во услови на долготрајниот топлотен бран. Огромен облак од црн чад се надвисна над главниот град, предизвикувајќи многу проблеми со дишењето.
„Вчера имаше неверојатна борба со огнот цел ден. Небото беше сиво и црвено и пепел паѓаше врз нас. Беше апокалиптично. Чадот навлезе во мојот дом и морав да спијам со маска, бидејќи не можев да дишам“, рече Миривили, додавајќи дека е тешко да се биде на отворено.
„Останувате без здив и многу лесно чувствувате како ви се врти“, вели таа, додавајќи дека Акропол исто така бил затворен за посетители.
