Двете одлуки, за заемот и за 20-тиот пакет санкции, досега беа блокирани од унгарскиот премиер во заминување Виктор Орбан, оправдувајќи го своето вето со наводното доцнење на Украина во поправката на нафтоводот Дружба, кој ја снабдува Унгарија со руска нафта и беше оштетен во нападот со руски беспилотни летала во западна Украина кон крајот на јануари.
Украина во вторник објави дека поправките се завршени, по што нафтата почна да тече низ нафтоводот и треба да стигне до Унгарија во текот на денот.
Лидерите на земјите-членки се согласија за заем за Украина на самитот во Брисел минатиот декември, но Унгарија последователно го блокираше усвојувањето на измени на буџетската регулатива, за што се бара едногласност, а без што ЕУ не може да подигне заем бидејќи европскиот буџет гарантира за тој заем.
Две третини од заемот од 90 милијарди евра, 60 милијарди евра, се наменети за воена помош, а 30 милијарди евра за поддршка на украинскиот буџет за да се обезбеди континуирано функционирање на државата и основните јавни услуги.
Украина треба да ги користи овие средства за купување оружје и опрема произведени во ЕУ, а од надвор само ако не се достапни во Европа.
Заемот за Украина беше одобрен во рамките на механизмот за „засилена соработка“ бидејќи не беше можно да се постигне договор меѓу сите земји-членки. Унгарија, Чешка и Словачка се откажаа и нема да учествуваат во исплатата на каматата.
Лидерите на земјите-членки одлучија на заедничко задолжување откако немаше консензус за користење на замрзнатите руски средства за репарацискиот заем.
20-тиот пакет санкции вклучува основа за идна забрана за поморски услуги за руска нафта, која ќе се спроведува во целосна координација со Г7 и Коалицијата за ограничување на цените.
60 физички и правни лица кои го поддржуваат рускиот воено-индустриски комплекс во неговата агресија против Украина се додадени на листата на санкционирани. 20 кредитни или финансиски институции кои подлежат на забрана за трансакции се додадени на листата.
