Постои „сериозен ризик“ собирот во Глазгов да не ги даде посакуваните резултати, рече Гутереш на прес-конференција пред состанокот на шефовите на влади и земјите од Г-20 на индустриски најразвиените земји овој викенд во Рим.
„Тоа не е предвидување, туку предупредување. Имаме уште време да ги вратиме работите на вистинскиот пат и оваа средба на Г20 е можност да го направиме тоа“, рече Гутереш.
Тој рече дека има уште многу да се работи на сите климатски цели и дека тоа треба да се забрза.
„Не е предоцна, но треба да дејствуваме сега“, рече Гутереш.
Тој во неколку наврати издаде аларм и предупредуваше за претстојната климатска катастрофа и укажа на „посебната одговорност“ на земјите од Г20, кои претставуваат најголем дел од емисиите на стакленички гасови во светот.
„Ако сакаме вистински успех, а не само фатаморгана, потребна ни е поголема амбиција и повеќе акција“, повтори тој денеска.
„Ова ќе биде можно само со масовна мобилизација на политичката волја и за тоа е потребна доверба меѓу клучните актери.“
Тој оцени дека враќањето на довербата е најважната цел на оваа средба на Г20.
