Портпаролот на Европската комисија, Томас Рение, изјави на прес-конференција дека Унијата спроведува заедничка трговска изјава со Соединетите Држави „од првиот ден“ и дека останува во тесна координација со Вашингтон и институциите на ЕУ.
„Целосно сме посветени на предвидлив и заемно корисен трансатлантски однос, но исто така бевме многу јасни: ако САД преземат мерки што не се во согласност со заедничката изјава, ќе ги држиме сите опции отворени за да ги заштитиме интересите на ЕУ“, рече тој.
Кога беше прашан за можни контрамерки, Рение одби да навлезе во детали, велејќи дека Комисијата нема да се занимава со „шпекулативни закани што не се оствариле“.
„Ова не е прв пат да се соочуваме со закани. И не е прв пат од ова место да ви порачаме дека остануваме многу смирени, фокусирани на спроведување на заедничката изјава во интерес на нашите компании и нашите граѓани, од двете страни на Атлантикот“, додаде портпаролот.
Најновата закана со царини, објавена во петокот, следеше по критиките на Трамп дека ЕУ не ги исполнила целосно своите обврски според трговскиот договор. Со тој договор беше утврдена царина од 15 проценти за поголемиот дел од извозот од ЕУ, вклучувајќи автомобили и делови за автомобили, додека од Унијата се очекуваше да го прошири пристапот до пазарот за американските индустриски стоки и возила.
