Данска забележа највисока температура во својата историја на мерења, откако Велика Британија, Франција, Швајцарија и Германија веќе соборија температурни рекорди во јуни, додека временскиот систем продолжува да се движи кон Полска.
Научниците велат дека ваков топлотен бран би бил речиси невозможен без климатските промени предизвикани од човекот, што ги направи исклучително топлите ноќи оваа недела 100 пати поверојатни отколку пред само две децении, објави Ројтерс.
„Топлинскиот бран ќе го достигне својот врв во текот на викендот, кога температурите ќе бидат далеку над 40 степени во некои делови од Германија“, изјави метеорологот Карстен Брант.
Германската национална метеоролошка служба соопшти дека во петокот, во близина на градот Сарбрикен на границата со Франција, е измерена рекордна температура од 41,3 Целзиусови степени, според прелиминарните податоци.
Во исто време, Данскиот метеоролошки институт објави дека во саботата северно од градот Орхус се измерени 37 степени, што е највисока температура откако почнале мерењата во 1874 година.
Апел до граѓаните да штедат вода
Германската метеоролошка служба издаде предупредувања за екстремни температури за речиси целата земја, додека властите ги повикаа граѓаните да штедат вода.
Се предвидува дека температурите ќе бидат околу 36 степени низ целата земја, а локалните максимални температури ќе достигнат 42 степени. Температурите, исто така, надминаа 30 степени во речиси цела Полска.
Во Франција за време на топлотниот бран починаа десетици луѓе, меѓу нив и помлади и постари лица. Температурите над 40 степени Целзиусови го нарушија железничкиот сообраќај и производството на електрична енергија, доведоа до забрана за консумирање алкохол на јавни места, затворање на училиштата и одложување на настани на отворено.
Италијанското Министерство за здравство издаде црвена тревога за 18 градови, вклучувајќи ги Милано, Рим, Торино, Венеција, Џенова, Фиренца и Болоња, за сабота и недела, при што се очекува температурите да достигнат 39 степени.
Во Болцано, во италијанските Алпи, е забележана најтоплата јунска ноќ откако постојат мерења, бидејќи температурата не падна под 25,4 степени Целзиусови, соопшти градскиот метеоролог Дитер Петерлин на социјалната мрежа Икс.
Кабинетот на францускиот премиер соопшти дека, иако се очекува топлотниот бран да се намали, притисокот врз здравствениот систем ќе остане висок, а бројот на хоспитализации ќе се зголемува уште неколку дена.
Официјалните лица, исто така, изјавија дека бројот на шумски пожари во Франција е поголем отколку во истиот период минатата година поради екстремната топлина.
Рекордните температури се последица на феноменот „Омега блок“
Прогнозите покажуваат дека најекстремните жештини ќе почнат да попуштаат за време на викендот, а во недела се очекуваат силни грмотевици.
Низ цела Европа, многу културни споменици се затворени поради жештината, земјоделството трпи штети, а некои болници се борат да се справат со зголемениот број пациенти.
Според Климатскиот монитор на Ројтерс, температурите за време на овој топлотен бран биле далеку над сезонскиот просек поради метеоролошкиот феномен познат како „Омега блок“.
Овој модел задржува голема маса топол воздух над одредени подрачја подолг период, додека поладен воздух се наоѓа на неговите рабови.
