Поради подготовките за митингот, на кој Вучиќ очекува десетици илјади луѓе пред Собранието на Србија, центарот на Белград е блокиран за сообраќај до понеделник наутро, се поставуваат шатори пред зградата на парламентот, сообраќајот е запрен на споредните улици, а линиите на јавниот превоз се променети или привремено прекинати.
„Сè е подготвено за настан каков што досега не е виден“, пишуваат денеска медиумите, пропагандно наклонети кон Вучиќ и владејачката Српска напредна партија (СНС).
Се најавуваат целодневни настани наменети за деца и млади, музичка програма од фолк-ѕвезди и развевање на „рекордно српско знаме, долго повеќе од 500 метри и тешко речиси еден тон“, што ќе биде претходница на обраќањето на Вучиќ во кое се очекува да зборува „за претстојните избори и новите државни мерки, со фокус на политичките разлики во земјата“.
Митингот во Белград е дел од кампањата „Србија победува“, со која Вучиќ се обидува да се спротивстави на повеќемесечната кампања на студентското движење „Студентите победуваат“, кое бара предвремени парламентарни избори.
На денешниот митинг во Белград вчера му претходеше отворањето на дел од автопатот наречен Моравски коридор, на кој присуствуваше Вучиќ, што јавноста го смета за зајакнување на изборната кампања, иако – и покрај бројните најави на Вучиќ – изборниот календар сè уште не може со сигурност да се предвиди.
Десетици илјади луѓе од целата земја се очекуваат утре во Краљево, вклучувајќи студенти, во бранот на антивладини протести што траат повеќе од година и пол, предизвикани од смртта на 16 лица при уривањето на стреата на железничката станица во Нови Сад на 1 ноември 2024 година, во трагедија за која демонстрантите ја обвинуваат корупцијата и неактивноста на државните институции.
