Канада ја испорачува речиси целата своја нафта во Соединетите Американски Држави, што сочинува 60 проценти од американскиот увоз на нафта, околу четири милиони барели дневно.
Премиерот на Канада, Марк Карни, изјави дека провинцијата Алберта поднела планови до Канцеларијата за големи проекти за почеток на изградба на нафтоводот до септември 2027 година. Нафтоводот би бил долг повеќе од 1.000 километри и би се протегал до западниот брег на Британска Колумбија по траса што следи дел од коридорот „Транс Маунтин“ кој веќе оди до пацифичкиот брег.
„Канада има можност што се случува еднаш во животот. Можност што ќе ја дефинира нашата иднина“, рече Карни.
Карни рече дека серијата најави направени во четвртокот ќе поттикнат повеќе од 200 милијарди канадски долари (123 милијарди евра) нови директни инвестиции, додека Канада ја унапредува својата трговска позиција низ Азија.
Тој, исто така, објави дека Канада ќе го зголеми производството на течен природен гас повеќе од трипати со развој на пет терминали во текот на следната деценија, а Отава ќе инвестира 10 милијарди канадски долари (6,1 милијарди евра) за надградба на пристаништето Ванкувер.
Премиерката на Алберта, Даниел Смит, изјави дека канадската покраина сака да го удвои производството на нафта и да го изгради нафтоводот до 2035 година.
„Нема никакви сомнежи дека овој нафтовод е проект од национален интерес, проект кој ќе помогне да се поврзе нафтата од Алберта со глобалните пазари и да се зајакне економската иднина на нашата земја во наредните децении“, рече Смит.
Нафтоводот е дел од напорите на Карни да ја намали зависноста од пазарот на САД, каде што Канада продава три четвртини од своите стоки и услуги, а претходно изјави дека ќе ја удвои трговијата со други земји.
Американскиот претседател Доналд Трамп се заканува дека ќе воведе царини од 100 отсто за Канада и постојано изјавува дека Канада треба да стане 51-ва држава на САД.
Тој оваа недела одби да одобри долгорочно обновување на трговскиот договор меѓу САД, Мексико и Канада, склучен во 2020 година за време на неговиот прв мандат.
