Американската агенција одобри итна употреба на вакцината откако внимателно ги прегледа резултатите од клиничките испитувања спроведени од Фајзер врз илјадници деца.
За итна употреба одобрени се детските дози од вакцината, само една третина од количеството што им се дава на тинејџери и возрасни.
Останува уште една регулаторна пречка, во вторник Центарот за контрола и превенција на болести (ЦДЦ) ќе даде подетални препораки за тоа кои деца треба да се вакцинираат, а конечната одлука веднаш потоа ќе ја донесе директорот на агенцијата.
„Со оваа вакцина децата можат да се вратат на нешто што е подобро од тоа да бидат затворени дома или учење на далечина, кога не можат да ги видат своите пријатели. Вакцината ќе ги заштити нив, но и нашите заедници“, рече д-р Кавсар Талат од Универзитетот Џон Хопкинс.
Неколку земји почнаа да користат други вакцини против ковид за деца под 12 години, вклучително и Кина, која почна да ги вакцинира децата на возраст од три години. Но европските регулаторни тела тукушто почнаа да ги разгледуваат детските дози на вакцината.
Со одлуката на ФДА Фајзер планира да почне со испорака на милиони педијатриски дози вакцина, која има портокалово капаче за да не биде заменета со виолетовите капачиња за сите други вакцини во ординациите, аптеките и другите места за вакцинација. Децата ќе примаат две дози на временско растојание од три недели.
