Американската администрација објави видео на социјалните мрежи во кое Трамп како предмет на истрагата ги именува американските нафтени гиганти Ексон мобил и Шеврон.
„Цените на нафтата паднаа толку многу, а ние воопшто не го гледаме тоа на бензинските пумпи“, кажа Трамп.
На својата социјална мрежа Трут соушал шефот на Белата куќа ги обвини големите нафтени компании дека не успеале да го пренесат намалувањето на трошоците на потрошувачите.
„Големите нафтени компании не ги намалуваат цените на бензинските пумпи во согласност со драматичниот пад на цените по кои набавуваат сирова нафта. Тие цени паѓаат како карпи! Со други зборови, ги дерат потрошувачите“, напиша Трамп, додавајќи дека му наложил на Министерството за правда „веднаш да почне истрага“.
Цените на нафтата нагло пораснаа по американските и израелските напади врз Иран кон крајот на февруари, што доведе до зголемување на цените на горивата во САД. По привремениот договор меѓу Вашингтон и Техеран и повторното отворање на Ормускиот теснец, цената на американската сирова нафта падна за околу 36 проценти од нејзиниот мајски врв.
Во исто време, според Американската автомобилска асоцијација, просечната цена на бензинот во САД падна шеста недела по ред и моментално е 3,93 долари за галон, што е речиси 14 проценти пониско од нејзиниот врв во мај. Сепак, бензинот е сè уште значително поскап отколку во јануари, кога во просек изнесуваше 2,76 долари за галон.
Ексон мобил и Шеврон не одговориле на барањата на Ројтерс за коментар за обвинувањата на Трамп, но Американскиот институт за нафта (АПИ), кој ги претставува најголемите производители на нафта, ги отфрли тврдењата на Белата куќа.
„Цените на бензинот не ги следат автоматски цените на сировата нафта, особено за време на големи глобални нарушувања што продолжуваат да влијаат на снабдувањето, преработката и залихите“, изјави портпаролката на АПИ Бетани Вилијамс.
Трамп го отвори прашањето за цените на горивата додека републиканците се обидуваат да одржат тесно мнозинство во Конгресот пред изборите на средина на мандатот, а трошоците за живот остануваат клучно политичко прашање во Соединетите Американски Држави.
