Амандманите на законот добија 49 гласа „за“ и 4 „против“. Тие беа поддржани, освен од претставниците на СДС на Јанша, од коалициите на НСи, СЛС и Фокус, Демократи и Ресница, кои сега би можеле да ја формираат основата за можен коалициски договор.
Претставниците на Левица и Весна беа против, а оние од Движењето на слободата и Социјалдемократите (СД) се воздржаа, додека некои беа отсутни. Предложените измени го намалија бројот на министерства од 19 на 14.
Претседателот на СДС, Јанша, во петокот објави дека, доколку се усвојат измените на законот за влада, СДС ќе им ги испрати на сите партии почетните точки за коалициски договор, врз основа на кој би се формирала нова влада.
Од досегашните гласања во парламентот, повеќе или помалку е јасно дека се формира коалиција од СДС, Демократите, триото НСи, СЛС и Фокус и партијата Ресница од десницата, забележува СТА.
Словенечката претседателка Наташа Пирц Мусар минатата недела ја информираше словенечката јавност дека по консултациите со политичките партии нема никому да му даде мандат за формирање влада бидејќи никој нема поддршка од мнозинството и дека процесот на избор на мандатот ќе му го препушти на парламентот.
Таа ја објасни својата одлука со недостигот од меѓусебно почитување и доверба за време на консултациите со парламентарните партии, оценувајќи го како лош знак за соработка со потенцијална нова влада.
Јанша нагласи дека СДС нема да формира влада по секоја цена. Во парламентот мандатарот може да го предложи клуб на пратеници или десет пратеници. За формирање влада е потребно мнозинство од 46 гласа во парламентот.
Техничкиот премиер Роберт Голоб, претседател на Движењето на слободата и релативен победник на изборите, објави дека не може да собере доволно поддршка за формирање влада. Движењето на слободата е релативен победник на изборите со 29 пратеници, еден повеќе од СДС.
Јанша со поддршка на предизборната коалиција предводена од НСи, која има осум пратеници, Демократите со шест пратеници и Ресни.ком со пет, има повеќе од 46 претставници потребни за мнозинство во словенечкиот парламент, кој има вкупно 90 претставници.
