„Непријателските активности на покровското боиште неодамна беа насочени кон Добропоље, особено по линијата помеѓу Родинское и Билицкое. Русите жестоко притискаат врз Родинское, малку по малку ја прошируваат својата контрола врз тоа место и користејќи ги своите вообичаени тактики навлегуваат подлабоко во таа област“, според извештајот на Дипстејт.
Слични обиди за упади се евидентирани и кон Билицкое, кој има исклучително важна улога во овој регион бидејќи би можел да им служи на Русите како клучен логистички центар и отскочна даска за понатамошен напредок.
Воените аналитичари истакнуваат дека руската команда го смета пробивот до позициите јужно од Добропоље за клучен. Тие планираат да акумулираат дополнителни сили во таа област за да продолжат со директен напад врз самиот град.
„Доколку непријателот се пробие во областа јужно од Добропоље, тоа ќе ја загрози целата логистика и операции во самиот град бидејќи ќе биде нападнат од руски беспилотни летала. Украинските одбранбени сили во моментов вложуваат максимални напори за да ги спречат Русите да ги реализираат тие планови“, објаснуваат аналитичарите.
Дипстејт се осврна и на драматичната ситуација во Костјантиновка. Според нивната проценка, руските сили веќе се пробиле во периферијата на тој град од неколку различни насоки и продолжуваат со улични борби и инфилтрација во населбите на градот.
Аналитичарите предупредуваат дека евентуалниот пад на Костјантиновка целосно би го отворил патот за руската армија за понатамошен напредок кон клучната украинска агломерација Славјанск – Краматорск.
