Руското Министерство за надворешни работи на Телеграм објави дека Русија ќе изведува „систематски напади“ врз објекти поврзани со украинскиот воено-индустриски комплекс во Киев, по она што го опиша како „крвав напад“ врз зградата на факултет и студентски дом во од Русија окупираниот дел од Луганската област, во кој, според Москва, загинале 21 студент.
„Сето ова дојде до точка на пукање“, порача руското министерство.
Москва тврди дека целите ќе бидат локации каде што „со помош на експерти од НАТО“ се проектираат, се произведуваат и се подготвуваат украински дронови.
„Нападите ќе бидат насочени и кон центрите за донесување одлуки и командните пунктови“, се наведува во соопштението.
Украинскиот претседател Володимир Зеленски претходно изјави дека четири лица загинале, а околу 100 се повредени во руските ноќни напади, за кои Москва тврди дека се одговор на украинскиот напад врз зградата на факултетот во Старобилск.
Руските власти објавија дека бројот на загинатите во тој напад се зголемил на 21 по завршувањето на акцијата за пребарување и спасување во неделата.
Украина ги отфрли руските обвинувања и порача дека нејзините сили гаѓаат исклучиво воена инфраструктура и објекти што служат за воени цели, со „строго почитување на меѓународното хуманитарно право и правилата на војување“.
Независната проверка на тврдењата на двете страни и натаму е отежната поради војната, која трае од 2022 година.
Руските функционери изјавија дека украински дронски напад на 22 мај погодил студентски дом и факултетски комплекс во Старобилск, при што, според нивните тврдења, загинале 21 лице, а 63 биле повредени.
Според властите поставени од Русија во таканаречената Луганска Народна Република, погодени биле стручно училиште и студентски дом на педагошки универзитет, каде што наводно имало 86 студенти на возраст од 14 до 18 години.
Тие наведоа дека операциите за пребарување и спасување завршиле на 23 мај, откако биле пронајдени сите жртви.
Украина ги отфрли тие обвинувања, истакнувајќи дека нејзините сили не гаѓале цивили. Генералштабот соопшти дека украинските единици наместо тоа погодиле руски воен објект во областа на Старобилск, поточно штаб на единицата за дронови Рубикон, за која Киев вели дека учествува во напади врз украински цивили.
„Вооружените сили на Украина гаѓаат исклучиво воена инфраструктура и објекти што се користат за воени цели“, порача Генералштабот, додавајќи дека сите операции се во согласност со меѓународното хуманитарно право.
Старобилск е под руска окупација од раната фаза на инвазијата.
Рускиот претседател Владимир Путин по инцидентот ѝ наредил на војската да подготви одмазднички мерки.
Потоа, Русија ноќта меѓу саботата и неделата изведе еден од најголемите воздушни напади во војната, лансирајќи околу 90 ракети и повеќе од 600 дронови во, како што опишаа функционери, еден од најтешките напади врз Киев досега. Русите исто така потврдија дека во рамките на тие напади ја нападнале Украина со балистичкиот проектил орешник, што е третпат досега од почетокот на војната.
Русија првпат го употреби проектилот орешник против Украина во ноември 2024 година во напад врз градот Днипро, а последен пат на 9 јануари годинава во напад врз Лавовската област во западна Украина.
Украинските власти соопштија дека до понеделникот загинале најмалку две лица, а 87 се повредени, додека итните служби продолжиле со операции за пребарување и спасување низ главниот град.
Украинското Министерство за обнова објави дека по нападите за време на викендот примило речиси 1.000 барања за станбен надомест во Киев, што сведочи за размерите на штетата врз станбените области и инфраструктурата.
Русија во текот на војната повеќепати издаваше слични предупредувања, продолжувајќи со нападите врз украинските градови. Киев и неговите западни сојузници ја обвинуваат Москва за намерно гаѓање цивилна инфраструктура, што Русија го негира.
