На рускиот полуостров Кола, директно наспроти границата со Норвешка, се наоѓа еден од најголемите нуклеарни арсенали во светот, кажа Столтенберг, кој сега е норвешки министер за финансии. „Тоа оружје не е насочено кон Осло – туку е насочено кон Вашингтон и Њујорк. Но, Норвешка помага во следењето на руските подморници кога ги напуштаат своите бази“.
Тој додаде дека Норвешка, исто така, придонесува со обезбедување рани предупредувања за лансирање ракети и полетувања на авиони. „Слична е ситуацијата во Финска и во многу други европски земји. Тоа е од клучно значење за безбедноста на Соединетите Американски Држави“, смета тој.
Столтенберг призна дека постојат разлики во ставовите меѓу САД и Европа во врска со трговијата, климатските промени и безбедносните прашања. Според Столтенберг, најважното нешто што Европа може да го направи за да го зачува НАТО е да инвестира повеќе во одбраната. „И токму тоа го правиме. Германија сега е на добар пат да стане најголемиот инвеститор во одбраната во Европа“.
