На парадата учествуваа воени авиони од 11 европски држави, како и околу 500 војници од земјите-членки на таканаречената Коалиција на подготвените, група држави што ветија дека ќе помогнат во обезбедувањето безбедносни гаранции за Украина по завршувањето на војната.
Францускиот претседател Емануел Макрон на прославата покани околу 30 странски лидери, а настанот беше замислен како демонстрација на европското единство и подготвеноста Европа да преземе поголема одговорност за сопствената безбедност.
Посебно внимание привлече присуството на украинскиот претседател Володимир Зеленски, кого го пречека сопругата на Макрон, Брижит Макрон. Зеленски беше поздравен со аплауз од присутните гости.
На свеченоста присуствуваа и германскиот канцелар Фридрих Мерц, британскиот премиер Кир Стармер, како и српскиот претседател Александар Вучиќ, албанскиот премиер Еди Рама, црногорскиот претседател Јаков Милатовиќ…
Според француските власти, годинешната парада требаше да испрати јасна порака дека Европа останува обединета, продолжува да ја поддржува Украина и е подготвена дополнително да ги зајакне сопствените одбранбени капацитети.
Денот на Бастилја се одбележува во спомен на падот на затворот Бастилја на 14 јули 1789 година, настан што се смета за почеток на Француската револуција и симбол на борбата за слобода, еднаквост и братство. Во Франција овој ден се слави како национален празник со воени церемонии, воздухопловни прелети, концерти и огномети низ целата земја.
