УСКОК и хрватската полиција утринава спроведоа акција во која е уапсен легендарниот фудбалер Дарио Шимиќ. Тој е осомничен дека нелегално ги добил потребните дозволи за камп во Тисно. Деталите за акцијата се уште не се познати, а повеќе информации се очекуваат во наредните часови.
Заедно со Шимиќ е уапсена и Неда Ливљаниќ, поранешна раководителка на Одделот за туризам при Службата за економија и имотно-правни работи на поранешната Државна управа на Шибенско-книнскиот регион. Таа наводно му ги прибавила дозволите на Шимиќ, а медиумите пишуваат дека и претходно била предмет на истраги за слични случаи.
Педесетгодишниот Дарио Шимиќ е легенда на хрватскиот фудбал. Во својата кариера настапуваше за Динамо Загреб, Интер, Милан и Монако. Најголемите успеси ги постигна со Милан (2002–2008), освојувајќи две Лиги на шампиони, Серија А, Купот, ФИФА Светско клупско првенство и УЕФА Супер куп.
За хрватската репрезентација одигра 100 натпревари и постигна три гола. Беше дел од генерацијата што на Светското првенство во 1998 година го освои бронзениот медал.
