Фудбалскиот свет ја загуби една од своите најголеми икони. Кевин Киген, поранешниот англиски репрезентативец и тренер, почина на 75-годишна возраст, потврди неговото семејство. Тој почина опкружен со својата сопруга и ќерките, откако се бореше со рак во четврти стадиум. Блискиот пријател и новинар Пит Грејвс го пренесе семејното соопштение, во кое се бара приватност во тешките моменти.
Киген ја започна професионалната кариера во Сканторп Јунајтед, а потоа во 1971 година премина во Ливерпул, каде за шест години одигра 323 натпревари и постигна 100 голови. Со „црвените“ освои три титули во англиското првенство, Купот на европските шампиони, два Купа на УЕФА и ФА Купот. Подоцна заигра за Хамбург, со кој стана шампион на Западна Германија и ги освои „Златните топки“ во 1978 и 1979 година.
По играчката кариера, Киген стана успешен тренер, оставајќи неизбришлив белег во Њукасл Јунајтед. Го презеде клубот во 1992 година, го спаси од испаѓање и го воведе во Премиер лигата, а во сезоната 1995/96 беше близу до титулата, но заврши втор зад Манчестер Јунајтед. Навивачите на Њукасл го паметат како „Крал Кев“.
Киген во својата тренерска кариера го предводеше и Фулам, Манчестер Сити и англиската репрезентација на Европското првенство во 2000 година. За Англија одигра 63 натпревари и постигна 21 гол, носејќи ја и капитенската лента.
