Иранската фудбалска федерација соопшти дека е шокирана од одлуката да им се одземат влезниците за Светското првенство, само два дена пред почетокот на турнирот. Оваа одлука ги фрли во очај илјадници ирански навивачи кои веќе ги имаат испланирано своите патувања и сместување, а сега нема да можат да присуствуваат на натпреварите на својата репрезентација. Светското првенство започнува во четврток, а Иран своите први два натпревари во групата Г ги игра против Нов Зеланд на 15 јуни и Белгија на 21 јуни во Лос Анџелес, по што на 26 јуни во Сиетл ги очекува средба со Египет.
Во соопштението на иранската федерација се наведува дека процесот на продажба на влезници за навивачите веќе бил започнат, но сега не можат да им ги обезбедат. „Сето ова е и покрај фактот што бројни ирански фудбалски навивачи, потпирајќи се на официјално објавената постапка, веќе ги направија потребните планови за да присуствуваат на натпреварите“, се додава во соопштението. Федерацијата остро реагираше, потенцирајќи дека „ускратувањето пристап на иранските навивачи до нивната легитимна и официјална распределба на влезници е чин спротивен на духот што владее на меѓународните натпреварувања и принципот на еднаквост меѓу земјите учеснички“.
Иранската федерација не прецизираше кој ја донел одлуката за одземање на влезниците, но ја повика ФИФА да се придржува до „принципите на неутралност, чесност и утврдени прописи“ и да спречи вонспортски проблеми да го засенат турнирот. Секоја фудбалска федерација чија репрезентација се пласирала на Светското првенство добива осум проценти од влезниците за секој натпревар на својот тим, кои потоа ги распределува на навивачите според сопствени критериуми. ФИФА засега нема одговор на барањето за коментар.
Учеството на Иран на Светското првенство беше обвиткано со неизвесност откако САД и Израел кон крајот на февруари започнаа воздушни напади врз таа земја, што предизвика регионален конфликт. Поради несигурноста околу добивањето американски визи и сè посилниот став во Иран дека присуството на тимот во САД треба да се сведе на минимум, федерацијата преговараше за преместување на базниот камп на репрезентацијата од Аризона во Мексико.
По недели на неизвесност, САД минатата недела одобрија визи за сите играчи – десет дена пред првиот натпревар – но неколку членови на стручниот штаб не ги добија. Американски функционер потврди за Ројтерс во петокот дека администрацијата издала „визи потребни за Иран да се натпреварува на Светското првенство“. Во меѓувреме, ФИФА во вторникот објави дека генералниот секретар Матијас Графстром одржал „позитивен разговор“ со претседателот на Иранската фудбалска федерација, Мехди Таџ, откако тимот пристигнал во својата база за време на турнирот. „Со оглед на тоа што тимот сега е во Мексико, ФИФА ќе продолжи со дијалогот и соработката со Иранската фудбалска федерација за да обезбеди позитивно искуство за тимот и делегацијата“, изјави Графстром.
