Во својата последна анализа за „Би-Би-Си“, Американецот детално ја коментираше играта и моменталната состојба на најдобриот тенисер на сите времиња.
„Неговата физичка подготвеност не му дозволи да одигра подобро против Јаник Синер во полуфиналето. Токму тоа е аспектот од неговата игра кој во моментов најмногу ме загрижува“, истакна Агаси.
Агаси соработуваше со Ѓоковиќ во периодот кога Србинот ја имаше најтешката повреда во кариерата и мораше да го оперира лактот. Нивната разделба се случи бидејќи Американецот не се согласуваше Новак експресно да им се врати на турнирите по хируршкиот зафат. Иако Агаси првично беше во право (Ноле доживеа рани елиминации во Индијан Велс и Мајами), неколку месеци подоцна кога Ѓоковиќ го освои Вимблдон, се потврди дека српскиот ас добро знаел што прави.
„Многупати во минатото сум го видел Новак како се жали на физички проблеми, но тогаш секогаш оставаше впечаток дека игра со огромна желба. Сега ми се чини дека тој всушност се обидува да сокрие како реално се чувствува на теренот“, додава поранешниот светски рекет број еден.
Според него, тоа јасно се отсликува и во самата игра на Новак:
„Понекогаш премногу брза со одговорите на ударите од ривалите, внимателно ги селектира поените и се обидува да избере решенија со кои ќе потроши што е можно помалку енергија. Тоа не е добар сигнал на подолг рок“, ги пренесува зборовите на Агаси шпанскиот портал „Пунто де брејк“.
Американецот потенцира дека Новак и понатаму го поседува потребниот квалитет за големи резултати, но физичките граници на 39-годишна возраст си го прават своето.
„Не е никаква тајна дека Ноле со тешки маки стигнува до самите завршници на грен слемовите. Неговото ниво на игра е надвор од секаква дискусија, но неговото тело испраќа сериозни сигнали. На Австралијан Опен стигна до финалето само затоа што не се потроши премногу на патот до таму. Да потсетиме, Лоренцо Музети му го предаде мечот кога водеше со 2-0 во сетови и беше пред победа, додека Јакуб Меншик воопшто не ни излезе на теренот. Но, против Синер во тоа епско полуфинале се потроши до максимум и затоа во финалето не му беше рамноправен ривал на Алкарас, освен во воведниот сет.“
Агаси продолжува со својата анализа за овогодинешните грен слем настапи на Новак:
„На Ролан Гарос беше уште полошо. Во првите две кола губеше по еден сет, а потоа против Фонсека доживеа пораз иако имаше водство од 2-0 во сетови. И на тој меч играше со срце, но пресуди неговата физичка состојба. На Вимблдон, пак, по четвртфиналниот маратон против Феликс Оже-Алијасим, тој едноставно немаше свежина и енергија за да му парира на Синер во полуфиналето.“
Како краен заклучок за моменталната ситуација на српскиот тенисер, легендарниот Американец порачува:
„Ѓоковиќ постепено ги троши своите енергетски резерви и тоа веќе станува сериозен проблем, дури и на краток рок.“
