Станува збор за воздухоплови исполнети со хелиум на сончева енергија кои летаат во стратосферата на надморска височина од околу 20 километри, далеку над комерцијалните авиони, од каде што емитуваат мобилен сигнал до корисниците на земјата.
Освен за телекомуникации, платформата е осмислена и за следење природни катастрофи, како што се шумски пожари, бури и поплави, во реално време.
Сончева енергија
Главниот модел, наречен СЕ2, е долг околу 65 метри и е покриен со соларни панели кои ги полнат батериите во текот на денот за работа во текот на ноќта.
Благодарение на напредните системи за контрола на летот, авионот може да остане речиси неподвижен над истата област и покрај промените на ветерот, со што се обезбедува континуирано покривање со мобилен сигнал.
За време на најновите тестирања, „Скај“ успешно ја задржа платформата во воздух повеќе од 12 дена, при што повеќе од 88 часа остана над избраното подрачје, што претставува важен чекор кон комерцијална примена на оваа технологија.
Првите услуги
Компанијата „Скај“ соработува со јапонската „СофтБанк“, која планира да лансира преткомерцијални ХАПС услуги во 2026 година, првенствено за поврзување на оддалечени области и обновување на комуникациите по природни катастрофи.
Експертите веруваат дека ваквите „летачки базни станици“ би можеле да станат важен дел од идните 6Г мрежи, бидејќи нудат помала латенција од сателитските системи и значително поширока покриеност од класичните копнени базни станици.
Доколку тестовите се покажат како успешни, ваквите летала би можеле да станат вообичаена глетка на небото над големи и ретко населени подрачја во наредните години.
