Според фармацевтката Катарина Дијаз, која го води проектот, целта е здравствените работници да се ослободат од чисто комерцијални задачи. На овој начин, фармацевтите можат да се фокусираат на клиничката работа и стручната помош на пациентите, додека клиентите добиваат максимална удобност и можност да купат сè што им е потребно во кое било време од денот или ноќта.
Купувачот ја покажува својата платежна картичка (кредитна или дебитна) на влезот. Откако системот ќе ја потврди картичката, вратата се отвора.
Кога купувачот ќе влезе и вратата ќе се затвори, неговата картичка автоматски се поврзува со него и со сите производи што ги зема од полиците во тој момент.
Купувачот едноставно го зема тоа што го сака и излегува од аптеката. Системот автоматски препознава кои производи се изнесени и ги наплаќа од поврзаната картичка – без скенирање, чекање и задржување.
Овој концепт им дава на клиентите целосна слобода и приватност. Купувањето може да трае помалку од една минута ако точно знаете што сакате, или можете да останете половина час, да ги прочитате состојките на производите и да изберете според ваше темпо, без никаков притисок.
Аптеката е отворена во ноември минатата година и од месец во месец бележи стабилен раст на прометот. Стапката на грешка на овој високотехнолошки систем е исклучително ниска – под два проценти – што им помогнало на купувачите брзо да го надминат почетниот страв од новата технологија.
Интересно е што повеќето забележани грешки всушност не се технолошки, туку од човечка природа.
На пример, бидејќи системот ги поврзува сите лица што ќе влезат низ истата отворена врата со картичката со која таа е отворена, се случува маж да ѝ ја придржи вратата на жена што влегува веднаш зад него. Во овој случај, вештачката интелигенција не знае дека станува збор за двајца одделни клиенти и на крајот ги наплаќа сите купени артикли на картичката на првиот клиент што ја отворил вратата.
