„Уште од првиот ден силно се заложивме да ги решиме проблемите што со години ја блокираа изградбата на клучката „Момин Поток“. Денес, на терен се гледаат конкретни резултати и проектот конечно напредува со динамиката што ја заслужува“, се истакнува во пишаната изјава на Ѓорѓиевски.
Како што информираат од Град Скопје, во рамки на тековните градежни активности, поставен е нов асфалт на коловозните ленти за влез во Скопје. По целосното расчистување на трасата, ќе се продолжело со изградбата и на коловозните ленти во правец кон булеварот „Словенија“.
„Паралелно се работи на изградба на три моста. Во моментов се врши уривање на стариот дел од мостот над реката Серава. Првиот дел од новиот мост е веќе изграден, а во следната фаза ќе се пристапи кон негово целосно комплетирање. Истовремено, во тек е и изградбата на нова атмосферска канализација, со што ќе се обезбеди подобро и поефикасно одведување на атмосферските води во овој дел од градот“, се додава во соопштението.
Со целосната реализација на клучката „Момин Поток“, се истакнува, значително ќе се растовари сообраќајот, ќе се овозможи побрзо и побезбедно движење и ќе се добие современо сообраќајно решение на една од најфреквентните точки во Скопје.
„По долгогодишниот застој, денес на терен се гледа напредок. Продолжуваме посветено, затоа што пред Скопје се уште многу големи инфраструктурни проекти“, порачува градоначалникот Ѓорѓиевски.
