На самитот, како што соопшти Кабинетот на заменик-министерката Трајков, се дискутирало за глобалните предизвици, мирот, демократијата, улогата на жените во општеството и економската соработка.
Во рамки на панел-сесијата „Демократијата, жените и иднината на мирот“, заменик-министерката Трајков се обратила на тема поврзана со улогата на жените во процесите на носење одлуки, демократскиот развој и европските перспективи на регионот.
„Европската иднина на регионот зависи од нашата способност да градиме демократски институции, да вложуваме во човечкиот капитал и да создадеме општество во кое младите и жените ќе имаат активна улога во носењето одлуки“, истакнала Трајков.
Таа нагласила дека евроинтегративниот процес не е само политичка цел, туку и суштинска реформска агенда насочена кон стабилност, економски развој и владеење на правото.
„Во време на глобални предизвици, потребни се повеќе дијалог, соработка и заедничка одговорност. Само преку партнерство и меѓусебна доверба можеме да изградиме посилна и поодржлива иднина за сите граѓани“, порачала заменик-министерката за европски прашања.
Учеството на самитот, како што се наведува во соопштението, претставува можност за продлабочување на меѓународната соработка, размена на искуства и афирмација на заложбите за европски вредности, дијалог и регионална стабилност.
