Клубот од Охрид потврди дека Кеита потпишал договор за сезоната 2026/2027 со можност за продолжување на соработката за уште една. Французинот настапува на позицијата лево крило, има 28 години и во „сино-белиот“ дрес ќе го носи бројот 9.
Кеита во Охрид пристигнува од грчки АЕК, а претходно дури осум сезони беше дел од француски ПСЖ, каде освои бројни домашни трофеи. Во својата кариера има настапи и за сите младински селекции на Франција, а во 2017 година освои бронзен медал на Светското јуниорско првенство.
„Започнува ново поглавје за мене. Горд сум што му се приклучувам на ГРК Охрид и што ја започнувам оваа нова авантура во Македонија. Му благодарам на клубот за довербата што ми ја укажа. Доаѓам со голема желба, амбиција и волја да го дадам максимумот на теренот за боите на клубот. Со нетрпение очекувам да започнам и да се запознаам со нашите навивачи“, изјави Кеита.
Со ангажманот на искусниот Французин, Охрид продолжува активно да го засилува ростерот со цел да има уште поконкурентен тим за следната сезона.
