Тереза Рибера, извршна потпретседателка за чиста, праведна и конкурентна транзиција, остро ги критикуваше оние кои се водат од „интересите“ на индустријата за фосилни горива, „наместо од научниците и сопствените граѓани“.
„Ова е драматично предупредување што природата повторно ни го испраќа за тоа што значи да имаме поинаков климатски систем“, изјави таа за Гардијан.
„Она што го доживуваме денес (во форма на рекордни топлотни бранови) е нешто за кое знаевме дека може да се случи, но не бевме доволно мудри да се справиме со основните причини. Сè уште се води жестока битка против фактите, науката, подготвеноста и инвестициите (во чиста енергија) и затоа ги разочаруваме луѓето. Мораме да ги отфрлиме таквите глупости засновани на лаги и насочени против интересите на луѓето.“
Се очекува рекордниот топлотен бран од минатата недела да се намали во делови од Западна Европа оваа недела, но Германија, Чешка, Полска и Унгарија забележаа рекордни температури од над 40 степени Целзиусови во неделата, додека топлотниот бран се ширеше кон исток.
Италија и Балканот вчера ги почувствуваа последиците од екстремната топлина, со растечка загриженост за ширење на пожари, додека украинската енергетска мрежа беше под притисок од температури повисоки од 36 степени.
Училиштата и туристичките атракции се затворени, компаниите ги испратија вработените дома, некои нуклеарни реактори мораа да бидат затворени, а Светската здравствена организација соопшти дека топлотниот бран на почетокот на летото е одговорен за повеќе од 1.300 дополнителни смртни случаи, иако вистинската бројка нема да биде позната уште некое време.
Рибера за тврдењата дека климатските политики – како што е пакетот мерки на ЕУ познат како „Зелен договор“, кој има за цел намалување на емисиите на стакленички гасови, заштита на природата и транзиција кон економија со ниски јаглеродни емисии – се непопуларни, ги обвини „бесмислиците и идеолошки мотивираните лаги“ што ги шират групите од интерес.
„Уморна сум да слушам тврдења дека ’луѓето повеќе не го поддржуваат Зелениот договор‘… тоа не е вистина“, рече таа. „Луѓето сакаат да имаат чиста вода што не е загадена. Луѓето сакаат да дишат чист воздух или да се потпираат на здрав екосистем, наместо да имаат загадена вода, да не можат да одгледуваат култури и жетви, и жештина што го прави градот невозможен за живеење“.
Наместо тоа, оние на одговорни позиции треба да го искористат топлотниот бран за да ги потсетат луѓето „дека не можеме да прифатиме да бидеме заплашени и замолчени“ од индустријата за фосилни горива и нејзините поддржувачи. „Не смееме да им дозволиме на луѓето да манипулираат со климатските акции и да ги напаѓаат само за да прикријат интереси што можат да донесат неверојатен профит за неколкумина на краток рок, (додека) го предаваат целото човештво“, рече таа.
Најсветлите економски перспективи на Европа лежат во обновливата енергија, додаде Рибера. „Кога луѓето зборуваат за конкурентност, не можеме да размислуваме за конкурентна индустрија во Европа ако мораме да се потпираме на нешто што не го произведуваме, а тоа се фосилните горива.“
Рибера беше министерка за животна средина на Шпанија од 2018 до 2024 година, период во кој владата силно ја промовираше обновливата енергија. Благодарение на толку големата експанзија на сончевата и енергијата на ветерот, додека другите земји забележаа пораст на сметките за струја по американско-израелската офанзива во Иран, Шпанија сега има еден од најевтините извори на електрична енергија во ЕУ, пренесува Гардијан.
„Моравме да ја промениме економската пресметка за да обезбедиме целата трансформација да биде заснована на можности за луѓето“, рече таа. „Прво требаше да се соочиме со јагленот”.
Доколку Европа не ја заврши трансформацијата кон економија со ниски емисии на јаглерод заснована на обновливи извори на енергија, целиот свет ќе страда, додаде Рибера.
„Затоа е толку важно Европа да успее: неуспехот или заобиколувањето би можеле да наведат многу други луѓе во светот да помислат: „Добро, тоа беше илузија, не функционира“. Затоа мора да се спротивставиме на барањата за забавување, за уште подолго потпирање на фосилни горива – тоа воопшто нема да помогне. Имаме одлична можност да продолжиме да градиме и забрзуваме промени и да ја зајакнеме отпорноста за да бидеме подготвени за потопла, посува или поризична реалност.“
