Случајот Моќник се однесува на продажбата на државен имот во село Ижишта, кој бил во сопственост на Општината Македонски Брод, а го користела Општина Пласница, го води судијката Ленка Давиткова. Според обвинителството, имотот му бил продаден на таткото на Милошоски и била направена штета врз буџетот од 50 илјади евра. Пратеникот Милошоски се товари дека ги сторил кривичните дела измама и злоупотреба на службената положба и овластувања. Во овој случај обвинети се и таткото на Милошоски и поранешниот градоначалник на Македонски Брод, Милосим Војнески.
Се работи за продажба на зграда од 157 квадратни метри и дворно место од 3.920 квадратни метри во Македонски Брод. Моќник се води против 13 лица, меѓу кои и против поранешниот претседател на комисијата за лустрација, Томе Аџиев.
За овој процес Милошоски вели дека актуелната власт преку политичко-обвинителски процеси врши притисок врз политичките противници и дека тој се обратил и до претставници на меѓународната заедница за да го следат судскиот процес сѐ со цел заштита на човековите права и добивање на фер и правично судење.
Последното откажано рочиште беше на 21 септември, а наредното е закажано за 1 октомври.
