Со едноставна регистрација, секој граѓанин добива пристап до широк спектар на дигитални услуги и информации преку ГИС порталот на Општина Центар. Целта е со примена на современи алатки да се подобри комуникацијата со граѓаните, да се зголеми транспарентноста и да се овозможи полесен пристап до општинските услуги, истакна градоначалникот Горан Герасимовски.
Преку порталот, граѓаните можат да ги следат новостите, соопштенијата и активностите на Општината, да се информираат за културната програма, јавните настани и манифестации, како и за тековните и планираните инфраструктурни проекти.
ГИС порталот овозможува и активно учество на граѓаните преку анкети, консултации и граѓански форуми, со што тие можат да придонесат во креирањето на општинските политики и утврдувањето на приоритетите.
Порталот постојано се надградува со нови функционалности и дигитални услуги. Меѓу најкористените е модулот за градинки, преку кој родителите имаат персонализиран увид во активностите на своето дете, присуството, известувањата од градинката и други важни информации.
Во рамки на ГИС порталот достапни се и информации за деталните урбанистички планови, со можност за пребарување и електронско поднесување барање за извод од ДУП. Граѓаните имаат пристап и до 3Д приказ на Општина Центар преку системот Digital Twin – дигитален близнак кој овозможува современа визуелизација на просторот, како и до Зелен катастар со детални податоци за зелените површини, парковите и дрворедите.
Дополнително, порталот содржи информации за јавната инфраструктура, сообраќајната мрежа и други просторни податоци од значење за жителите.
„Со развојот на ГИС порталот, Општина Центар создава модерна, транспарентна и ефикасна локална самоуправа, достапна за сите граѓани“, наведуваат од Одделението за односи со јавност на Општина Центар.
