Покраинската криминална полиција на Бургенланд запленила сомнителна тегла храна за бебиња од 190 грама „моркови со компири“ во градот Шицен ам Гебирге. Теглата ја пријавил купувач, а за среќа производот не бил консумиран.
Лабораториската анализа на примерокот, спроведена во саботата попладне во соработка со Федералното криминално биро, го потврдила присуството на отров за стаорци. Случајот е поврзан со истрага во Германија, каде што компанијата ХиПП очигледно била цел на уценувачи. Сомнителни тегли биле најдени и во Чешка и Словачка, каде што првите анализи исто така покажале присуство на отровна супстанца.
Според моменталните сознанија на полицијата, производите на кои им е потребно посебно внимание може да се препознаат по неколку карактеристики. На дното од теглата може да има бела етикета со црвен круг. Исто така, можно е капакот да е веќе отворен или оштетен, односно да го нема безбедносниот вакуум, па затоа карактеристичниот звук „клик“ не се слуша при првото отворање. Исто така, сведоци изјавиле дека производот има необичен или расипан мирис.
Полицијата упати итен апел до родителите и старателите и ги замолува да бидат исклучително внимателни. Доколку имате храна за бебиња ХиПП со горенаведените ознаки или забележите какви било неправилности, не ја отворајте и не му ја давајте на вашето дете во никој случај. Производот треба да се чува одделно од сите други прехранбени производи, а се препорачува да се користат ракавици при ракувањето.
По контакт со сомнителниот производ, задолжително е темелно да ги измиете рацете со сапун најмалку 30 секунди, а пред каков било контакт со други луѓе, особено со деца.
Трговскиот синџир Шпар Австрија реагираше со превентивно повлекување на целиот асортиман на ХиПП детски тегли од продажба. Компанијата ги замолува купувачите да не ги консумираат ХиПП теглите купени во продавниците Шпар, Еурошпар, Интершпар или Максимаркт, туку да ги вратат на местото на продажба. Како што наведуваат, на купувачите ќе им бидат вратени парите дури и без да приложат фискална сметка.
