Во авторскиот текст за белградскиот весник Политика Вучиќ, по повод проектот на регионална соработка кој ги опфаќа Србија, Албанија и Македонија, истакна дека тоа е прв пат на Балканот да се придвижи нешто што е добро за целиот регион, оценувајќи дека договорите потпишани минатата недела во Скопје се „историски“ и дека „историски ќе бидат и нивните резултати“.
Македонија, Србија и Албанија потпишаа во четвртокот договори чија цел е да се олесни трговијата во регионот, да се создаде единствен пазар на трудот и меѓусебна помош во вонредни ситуации, а регионалната иницијатива, „претходно нарекувана „мини Шенген“, официјално е преименувана во Отворен Балкан.
Вучиќ заедно со македонскиот и албанскиот премиер Зоран Заев и Еди Рама потпиша три документи – за разбирање и соработка за олеснување на увозот, извозот и движењето на стоката на Западниот Балкан, меморандум за разбирање и соработка околу слободниот пристап на пазарот на труд и договор за соработка и заштита од катастрофи на Западниот Балкан.
„Европа нè сака онолку колку што е потребно да не правиме проблеми, често растргната од внатрешните разлики“, оцени Вучиќ во текстот, истакнувајќи дека во Брисел не постои „целосно јасна стратегија кон Западниот Балкан, но и за другите европски територии кои не припаѓаат на Унијата“.
Вучиќ, укажувајќи на целта и намерата на иницијативата Отворен Балкан, наведе дека основачите на ЕУ „знаеле дека можат да ја надминат тешката историја само ако почнат да се поврзуваат преку економијата“ и дека во тоа доживувале противења од сите страни, но успеале.
„Србите, Албанците и Македонците не се ништо помалку паметни и вредни од Французите, Германците и Италијанците и другите кои преку Заедницата за јаглен и челик тргнале во изградба на ЕУ“, истакна Вучиќ.
Тој додаде дека учесниците на оваа регионална иницијатива сакаат да влезат во Европа, но дека Балканот без економски бариери е нивна „насушна потреба“.
