Трамп на својата мрежа Трут соушл објави дека неговата администрација „проучува и разгледува евентуално намалување на бројот на војници во Германија“ и дека одлуката ќе биде донесена „наскоро“. Реакцијата на Трамп беше поттикната од изјавата на германскиот канцелар Фридрих Мерц во понеделник, кој рече дека тимот на Трамп бил надигран во преговорите со Иран за прекин на војната и повторното отворање на Ормускиот теснец.
„Иранците се очигледно многу вешти преговарачи, или поточно, многу вешти во тоа да не преговараат. Тие им дозволуваат на Американците да дојдат во Исламабад, а потоа ги оставаат да си заминат со празни раце“, рече германскиот канцелар. Мерц ги повтори критиките вчера, нагласувајќи дека Европа „страда“ од последиците од затворањето на теснецот.
Трамп возврати обвинувајќи го Мерц дека мисли дека „е во ред Иран да има нуклеарно оружје“ и му рече дека „не знае за што зборува“. Минатата недела, Трамп го откажа второто патување на американските преговарачи во Исламабад, а преговорите за нуклеарната програма на Иран и Ормускиот теснец оттогаш се во застој.
Иако Мерц се обиде да ја минимизира ситуацијата во средата, отфрлајќи ги коментарите на Трамп и велејќи дека нивниот однос е „добар како и секогаш“, заканата на претседателот за повлекување на трупите веројатно ќе предизвика загриженост во Берлин и низ цела Европа.
Овој потег доаѓа во време на зголемени тензии меѓу САД и традиционалните европски сојузници, при што Трамп е сè погласен во своите закани за повлекување од НАТО алијансата.
Трамп на 1 април изјави дека „без сомнение“ размислува да го напушти НАТО затоа што европските сојузници не учествуваа во војната меѓу САД и Израел против Иран, ниту помогнаа во обезбедувањето на стратешки важниот Ормуски теснец.
Таквиот потег би бил катастрофален за европската безбедност, но се смета за малку веројатен поради американскиот закон од 2024 година кој му забранува на претседателот да се повлече од НАТО без двотретинско мнозинство во Сенатот или одлука на Конгресот. Затоа, експертите веруваат дека Белата куќа наместо тоа би можела да преземе чекори што ја поткопуваат алијансата, но не значат целосно повлекување. Едно такво сценарио е токму повлекувањето на американските сили од Европа.
Според Министерството за одбрана на САД, над 68.000 американски војници се стационирани во Европа. Најголемиот контингент е во Германија, каде што, според податоците на Конгресната истражувачка служба, имало повеќе од 35.000 во 2024 година, додека германските медиуми известуваат за поголем број, околу 50.000. Трамп постојано го критикуваше НАТО за време на двата свои мандати, обвинувајќи ги членките дека „ги искористуваат“ САД затоа што не издвојуваат доволно средства за своите одбранбени буџети.
Најновите потези на претседателот, како што се заканата за инвазија на Гренланд и нарекувањето на сојузниците „кукавици“ затоа што одбиле да помогнат во повторното отворање на Ормускиот теснец, ги наведоа експертите да ја опишат ситуацијата како „најлошата криза со која се соочил НАТО досега“.
Иво Далдер, кој беше претставник на САД во НАТО од 2009 до 2013 година, овој месец изјави дека „тешко е да се замисли дека која било европска земја сега би можела или би верувала дека САД ќе дојдат во нејзина одбрана“.
Само неколку часа пред објавата на Трамп, американскиот државен секретар Марко Рубио разговараше со германскиот министер за надворешни работи Јохан Вадефул за Иран и важноста од обезбедување слободна пловидба во Ормускиот теснец. Во среда, Трамп, исто така, објави дека разговарал со рускиот претседател Владимир Путин и предложил „кратко примирје“ во Украина.
